Sir 8

1 Не сварися с человеком сильным, и да не когда впадеши в руце его. 2 Не тяжися с человеком богатым, да не когда отяготит ти меру: 3 многих бо погуби злато, и сердца царская преклони. 4 Не сварися с человеком язычным и не накладай на огнь его дров. 5 Не играй с ненаказанным, да не приимут безчестия прародителие твои. 6 Не поноси человеку обращающуся от греха: помяни, яко вси есмы во епитимиах. 7 Не безчести человека в старости его: ибо и ты сам состареешися. 8 Не радуйся о мертвеце бывшем враждебнейшем тебе: помяни, яко вси умираем. 9 Не презри повести премудрых и в притчах их живи: 10 яко от них навыкнеши наказанию и служити вельможам удобно. 11 Не отступай от повести старцев: ибо тии навыкоша от отец своих: 12 яко от них навыкнеши разуму и во время потребно дати ответ. 13 Не возгнещай углия грешнику, да не сгориши огнем пламене его. 14 Не востани на лице досадителево, да не приседит яко наветник устом твоим. 15 Взаим не дай человеку крепльшу тебе, и аще даси, буди якоже погубивый. 16 Не поручайся выше силы твоея: и аще поручишися, яко воздаяй пецыся. 17 Не сварися со судиею: по разсуждению бо его будут судити ему. 18 С дерзым не ходи на путь, яко да не отяготится на тя: той бо сотворит по воли своей, и с буйством его погибнеши. 19 С яростивым не сварися и не иди с ним сквозе пустыню: пред очима бо его кровь яко ничтоже есть, и идеже несть помощи, тамо низложит тя. 20 С буим совета не твори: не возможет бо слова удержати. 21 Пред чужим не твори тайнаго: не веси бо, что родит ти. 22 Всякому человеку не являй сердца твоего, да не воздаст ти благодати ложныя.